De cómo Trotaconventos fabló con la mora de parte del arçipreste y de la respuesta que le dio

1. Por olvidar la coita, tristeza y pesar,
2. rogué a la mi vieja que me quisiese casar;
3. fabló con una mora non la quiso escuchar:
4. ella fizo buen seso, yo fiz mucho cantar.

1. Dixo Trotaconventos, a la mora por mí:
2. "¡Ya amiga! ¡Ya amiga! ¿Quanto ha que no vos vi?
3. No es quien ver vos pueda, ¿ y cómo estais así?
4. Salúdavos amor nuevo." dixo la mora, "¡Iznedrí!"

1. "Fija mucho vos saluda uno que es de Alcalá,
2. enbíavos una çodra, con aqueste alvalá:
3. el Criador es con vos que d'esto tal mucho ha,
4. tomadlo fija señora." Dixo la mora, "¡Legualá!"

1. "Fija, ¡sí el Criador vos dé plazer con salud,
2. que no gelo desdeñes pues, que más traher no pud!
3. Aducho bueno vos adugo, fablad me alaúd
4. no vaya de vós tan muda." Dixo la mora, "¡Ascut!"

1. Desque vido la vieja que no recabdava y
2. diz: "Quanto vos he dicho, bien tanto me perdí,
3. pues que ál no me dezides, quiérome ir de aquí?
4. Cabeçeo la mora. Dixo le, "¡Amxí, amxí!"

En quáles instrumentos no conviene los cantares de arávigo

1. Después fiz muchas cantigas, de dança y troteras,
2. para judías y moras y para entendederas,
3. para en instrumentos de comunales maneras,
4. el cantar que no sabes, óilo a cantaderas.